Ailtireacht agus oidhreacht

Bhí Oifig na nOibreacha Poiblí agus na hÚdaráis Áitiúla freagrach as foirgnimh chúirte a sholáthar agus a chothabháil go dtí mí na Samhna 1999 nuair a bunaíodh an tSeirbhís Chúirteanna. Cé go raibh go leor dul chun cinn déanta sna blianta díreach roimh 1999, bhí easpa suntasach maoinithe i gceist i gcláir thógála agus cothabhála tithe cúirte le blianta fada roimhe sin. Tá an tSeirbhís tar éis an deis a thapú tithe cúirte a chur ar fáil, a bhainistiú agus a chothú, ionas gur féidir ceartas a riaradh ar lucht úsáidte na cúirte i bhfoirgnimh atá feiliúnach, lánfheistithe agus a bhfuil dínit ag baint leo.

Tá 148 teach cúirte ainmnithe a bhfuil tábhacht áitiúil, réigiúnach nó náisiúnta ag baint leo. Breathnaítear ar na foirgnimh seo mar chuid d'oidhreacht ailtireachta na cathrach nó an bhaile, agus mar gheall ar sin, is struchtúir chosanta iad. Is iondúil go mbíonn na tithe cúirte suite i suíomh feiceálach, agus mar sin cuireann siad le carachtar amhairc na mbailte, mar is cuí d'institiúid phoiblí thábhachtach, agus braistint staire agus leanúnachais ag dul léi.

Tá roinnt nasc anseo do thithe cúirte ar fud na hÉireann, a thugann blas de chúlra stairiúil agus ailtireachta na struchtúr mórthaibhseach seo.